Primitivismus (Kunst)

Dr Begriff Primitivismus isch zum erste Mol z Frankriich im 19. Johrhundert as kunsthistorische Begriff bruucht worde. Er bezeichnet en Imitation vom Primitiven, wobii mä under de „Primitiven“ zerst emol d Italiäner und d Flame vom 14. und 15. Johrhundert verstande het.

Im Webster vo 1934 isch dr Begriff erwiiteret und beschriibe as dr Glaube an d Überlägeheit vom primitive Läbe, e Rückkehr zur Natur.

Primitivismus bezeichnet nit d Kunst vo indigene Völker, die früehneri Stammeskunst. Dr Primitivismus isch e Phenomen vo dr europäische Modärne, e modärne Kunstrichdig, wo sich vo dr Kunst vo de Primitive loot lo aarege.^[1]

S Wärk vom Paul Gauguin zellt as dr Usgangspunkt vom Primitivismus. Am Aafang vom 20. Johrhundert si d Fauviste vo indigene Stil beiiflusst worde, aber es isch 1907 s Bild vom Picasso Les Demoiselles d'Avignon gsi, won en allgemeins Inträssi an dr indigene Kunst gweggt het. Anderi Künstler vo dr Avantgarde wie dr Paul Klee, dr Joan Miró oder dr Alexander Calder hai Motive vo de Naturvölker as Metaphere für d Chreft vo dr Natur bruucht.^[2]

1. ↑ Duden, 1973
2. ↑ Klaus von Beyme: Das Zeitalter der Avantgarden: Kunst und Gesellschaft 1905–1955, S. 448, abgrüeft am 8. Januar 2011